மரணமடைந்த ஹியூக்ஸ்! மன வேதனையில் பந்துவீசிய சீன் அப்போட்

மரணமடைந்த ஹியூக்ஸ்! மன வேதனையில் பந்துவீசிய சீன் அப்போட் பவுன்சர் பந்து வீசி பிலிப் ஹியூக்ஸை நிலைகுலைய வைத்த வேகப்பந்து வீச்சாளர் சீன் அப்போட் மிகுந்த மன உளைச்சலில் இருக்கிறார். இவர் மீது எந்த தவறும் இல்லை. இருப்பினும் பிலிப் ஹியூக்ஸூன் இந்த நிலைமைக்கு தான் காரணமாகி விட்டோமே என புலம்பிக் கொண்டிருக்கிறார். சீன் அப்போட்டுக்கு இப்போது முழு ஆதரவு அவசியம் என்று தெரிவித்துள்ள அவுஸ்திரேலிய கிரிக்கெட் வாரிய தலைமை நிர்வாகி ஜேம்ஸ் சுதர்லாண்ட், இது ஒரு அசாதாரணமான நிகழ்வு. நடந்த சம்பவத்துக்கு எந்த வகையிலும் அவர் காரணம் கிடையாது என்பதை அனைவரும் உணர வேண்டும் என்று தெரிவித்துள்ளார். அதே போல் இங்கிலாந்து வீரர் ஸ்டூவர்ட் பிராட் கூறுகையில், பவுன்சராக பந்து வீசியதற்காக சீன் அப்போட் குற்ற உணர்வுக்குள்ளாக கூடாது. கிரிக்கெட்டில் பவுன்சர் என்பது வேகப்பந்து வீச்சாளர்களின் ஒரு யுக்தி என்று கூறியுள்ளார். 22 வயதான சீன் அப்போட் அவுஸ்திரேலிய அணிக்காக ஒருநாள் போட்டி ஒன்றிலும், மூன்று டி20 போட்டிகளிலும் ஆடியிருக்கிறார் என்பது குறிப்பிடத்தக்கது.